打從8月《信報》正式落入李家二少手，而佢又話要畀半年時間自己學習辦報之後，報紙行頭呢排都算幾風平浪靜，近期稍有異動嘅可能係南華早報，由星期二（3號）起將SundayMorningPost班夥計「融入」埋南華早報（即係編採合併），咁有無裁員呢？
據聞無，只係SundayMorningPost個老總NiallFraser選擇離開，據聞有兩名親信陪佢一齊撇。係咪不歡而散就無人敢評論，只可以講，啲報界老總級人馬唔撈，傳統做法係整個內部電郵同一定有餐食，但呢鋪兩樣都無……咁大家鍾意就自己諗埋落去囉！
講開南早，𠵱家其實好似前虎報員工天下咁，例如MarkClifford就喺今年4月由虎報轉會到南早，之後就陸續引入佢嘅班底。至於以後仲有無SundayMorningPost呢？答案係有，只不過負責管理嘅人換咗。