上咗任兩年嘅醫院管理局主席胡定旭，喺八方預期之內，再做多兩年主席。噚日政府終於公布，再委任胡主席做到08年。其實官場同醫生圈子個個都估到，胡主席同過江龍行政總裁蘇利民啱啱開始改革醫管局，磨合得咁好，加上特首同主席咁老友，點會無端端換人！
人稱肥胡嘅主席𠵱家身在美國，佢噚日同八方講，𠵱家最緊要搞好單醫生工時補水，仲話HA好多嘢都進步緊。佢又大吐早幾日喺拉丁美洲俾蚊咬嘅苦水，話「估唔到有咁多蚊，喺酒店等車去office嗰一陣間都俾蚊叮。」叫人去嗰度一定要帶定蚊怕水同蚊貼喎，估唔到佢同衞生署署長林秉恩咁老友，都唔聽吓衞生署呼籲，出外梗係要做防蚊措施嘛。