都唔明白點解巴西成日都有球員親屬俾劫匪綁架事件發生，但嗰邊嘅警察都遏止唔到，好似今季加盟AC米蘭，着起舒夫真高件7號波衫嘅奧利華拉，佢家姐莎華就成為咗最新嘅受害者！到𠵱家仲未知班綁匪想點，真係擔心死人。
今次綁匪嘅手法更加係猖獗到離晒大譜，消息話班綁匪孭晒成副架生，着到好似武裝分子咁，喺深宵時分闖入莎華位於聖保羅北部住宅區嘅屋企，先將佢老公同個8歲嘅仔綁起，然後擄走莎華。人哋小朋友得嗰8歲，班綁匪認真冇人性，咁樣嚇一嚇真係隨時有童年陰影，最慘係仲要擔心媽媽嘅安全，搞到我求大俠都戥佢心痛。
事件都發生咗成兩日，但到家吓都仲未知班綁匪想點，身在家鄉嘅家人固之然非常擔心，就算係遠在意大利嘅奧利華拉都唔好過，一來喺球隊仲未踢番起，二來仲要整多單咁嘅嘢，睇嚟佢都有排煩。
巴西球星樹大招風
不過話番轉頭，巴西球星「樹大招風」，連累親人經常成為綁架對象，好似兩年前羅賓奴個媽媽就遇上同一遭遇，好彩羅賓奴最後畀咗62萬港元贖金之後，總算平安無事。錢財身外物，希望班綁匪唔好傷及人命啦！
「其實巴西治安咁差，當地警方真係要諗諗計，如果唔係呢類事件無日無之發生都唔係辦法，人哋搵到錢唔通就要擔驚受怕咩？唔怪得個個巴西球員闖出名堂後，都要急住去歐洲搵食啦！」