投資特攻隊今周末由華度為大家精選咗一場歐洲國家盃外圍賽作推介，希臘現時情況唔多掂，主場都勢係假，仲要讓有幾位近期有態「金毛轟炸機」壓陣嘅挪威平/半，博挪威「空襲」成功，下盤咪錯過。冷選取巴西作客科威特遭悶和。文:華度
希臘上屆歐洲國家盃威威捧盃，但呢啲「盃賽專家」，只係靠喺決賽周咬住度氣連殺幾場，就成功跑出咗！轉打長途嘅「聯賽」，就好難保持穩定水準爭取佳績；𠵱家嘅歐洲國家盃外圍賽，相當於聯賽，「盃賽專家」希臘要發圍唔容易。
希臘補選兩守將欠進取
今周初喺外圍初盤見到，莊家開出希臘讓平/半盤口無耐，希臘就傳出前鋒柏巴度普路斯及中場拿高斯因傷退隊消息。但教練列哈格，只係補選多兩位防守球員入伍，分別係養傷超過兩年嘅前國腳柏沙蘇古路，以及過去個多月，同樣因傷未有上陣過嘅卡普錫斯。部份球迷未必對以上提到過嘅希臘球員有乜特別深刻印象，但列哈格呢一着，進取心似乎差少少喎！
客軍挪威就已經喺分組賽踢咗兩場，全勝之餘，上一場作客近年有番些少實力嘅匈牙利，更係清風送爽地半場贏3:0，全場贏到4:1；咁有說服力嘅表現，可謂多得陣中幾位「金毛轟炸機」表現回勇，好似今季喺球會復蘇嘅曼聯射手蘇斯克查，就喺呢場大捷入面獨建兩功；仲有布力般流浪攻擊中場摩頓柏達臣、利物浦守將懷斯等。相信今仗挪威只要打一家高空波，都夠炸毀希臘城牆，呢個受讓下盤愈睇愈正。
今周選冷門，都係避開一眾各有戰意對決嘅歐國盃外圍賽為妙，吼場友賽，科威特主場對巴西，博開和局。巴西呢場老遠從南美洲及歐洲飛到嚟亞洲嘅中東比賽，睇死班球星都會因為對手實力不濟，加上長途跋涉，無心戀戰。華度仲記得早兩年巴西強陣到訪廣州，鬥我哋中國隊，最後咪又係踢成0:0！
投資特攻隊金句
𠵱家嘅歐洲國家盃外圍賽，相當於聯賽，「盃賽專家」希臘要發圍唔容易。