香港人用Samson做英文名的近年不多，但係上市公司就有兩間叫Samson，分別係森信紙業（731）及順誠（531），森信7月底公布全年業績倒退46%後股價急挫，現價仲喺52周低位附近徘徊，無乜好講，但係順誠近日股價就有回勇迹象，兜底回升。
順誠從事家具業務，公司去年底才上市，雖然平日成交唔多，但係公司規模一啲都唔細，市值有106億元，而且獲多間大行關注，過去三個多禮拜分別有大摩、UBS同埋滙證唱好叫買。而前日滙證嘅最新報告話，分析員睇完廠後認為公司係亞洲區嘅「HiddenDragon」，更將公司目標價由5.3元調高至5.7元，相反同業卡森（496）暫時未見大行唱好，反而上月被UBS調低盈利預測及目標價。
成衣股佑威（627）在噚日開市前停牌，市場消息話，公司將透過大行發行CB畀基金，而CB行使價都幾高，較停牌前收市價0.255元有十幾個巴仙溢價。
佑威年報中記載集團今年3月底止淨資本負債比率僅2.4%，照計集資需要唔大，據講今次發CB係為咗擴大基金股東基礎。
咁點解唔直接批股？CB嘅特色係如果高唔過行使價，到期係要還錢畀投資者，但如果高過行使價，持有人可以隨時行使攞股票，即係基金持有CB坐底收息之餘仲可以睇定嚟食，咁係咪暗示佑威管理層對公司股價好有信心呢？
歐陽風