雖然廣告有話「會考無難度」，但每年攞唔過五科合格的學生亦為數不少，睇見咁多前路茫茫又冇喱自信嘅後生仔，陪伴住香港人成長嘅突發機構，早幾年就搞咗個「師徒創路學堂」，讓二十幾個年輕人，喺大型商業機構實習五個月，師徒一對一，貼心關懷，仲未計之前嘅語文溝通培訓，成個計劃由9月至翌年全期10個月嘅學費亦不過係5000蚊，每個月仲𢭃番1500蚊車船津貼、勤工準時仲有500蚊bonus，認真着數。
咁有意義嘅活動，愈嚟愈講社會責任嘅新鴻基地產，舊年就已經揼心口支持，安排旗下帝苑酒店、西田百貨、啓勝物業管理等公司嘅空缺，畀班迷途小羔羊重新發現人生嘅新目標，今年再接再勵。
噚日新地副主席郭炳江（圖）出席新一屆活動的誓師禮時就話，好滿意上屆同學嘅表現，公司亦請番唔少同學畢業之後轉長工，佢話人生有起有跌，未必事事稱心如意，但只是願意付出勇氣同毅力，最終必定踏上成功之路，同學千祈唔好氣餒。