改編自港產片《無間道》的荷李活電影《無間道風雲》（TheDeparted）前晚在港舉行首映，在港版中飾演劉健明的劉德華也有到場欣賞，至昨日他出席汽車活動時，談及麥廸文（MattDamon）演繹劉健明一角，他直言對方演技表面，更不認同兩位男主角會愛上同一個女人，加上該片粗口多以及片長達兩個半小時，覺得香港人未必接受。
萬眾期待、改編港產片《無間道》的荷李活電影《無間道風雲》今日正式在港上映，前晚該片在銅鑼灣舉行首映，在港版中飾演劉健明的劉德華、《無間道》演員林家棟、導演麥兆輝、編劇莊文強以及寰亞老闆林建岳均有出席。
笑言攞番版權費
導演麥兆輝在台上講述《無間道》被改編的感受時說：「我覺得好榮幸，因為荷李活版卡士好犀利，好彩香港都唔輸蝕。」至於華仔昨日在九龍城出席汽車品牌蓮花活動，問及他欣賞完《無間道風雲》後，覺得如何？他笑說：「都OK，不過覺得佢哋買咗一集嘅版權，但睇完好似將三集嘅元素加埋一齊，所以要問佢哋攞番錢。」
問華仔覺得麥廸文的表現如何？他說：「佢同我好唔同，我拍之前好多人都批評我做得唔夠好，唔夠奸，因為我覺得自己係做差人，喺差館入面唔可以咁奸。不過就覺得麥廸文做得比較奸，演繹比較表面。」問他有否失望？華仔說：「其實套戲嘅劇本好好，佢哋嘅版本都有精采對白，但我就覺得粗口得滯，整體都有8分。」
嫌電影時間太長
談到《無間道風雲》片長達兩個半小時，華仔坦言：「香港人都係承受時間短啲嘅戲，唔好咁長。」在港版中有兩位女主角陳慧琳和鄭秀文，但荷李活版就只有一位女主角，就是VeraFarmiga飾演的心理醫生，集港版兩位女主角於一身，華仔坦言不喜歡有此安排：「我唔鍾意兩個女仔變咗一個，唔覺得兩個人會鍾意同一個女人。點都好，個劇本本身有番咁上下，就算邊個國家攞嚟拍都可以好。」
採訪：胡比、魯萍
攝影：陳順禎、陳慧安
