退咗休嘅前滙豐大班艾爾敦，噚日以總商會主席身份，邀請東亞主席李國寶，為銀行家演講系列「打頭炮」。兩位重量級賓架相見，言笑晏晏，拍晒膊頭；而久未與銀行beat記者碰面嘅敦哥，風采依然，華華側聞，原來佢位大公子Andrew，將於本周末小登科，敦哥即將榮升新翁，難怪笑容咁甜啦。
敦哥爆料話，一對新人係大學同學，年輕人希望有個溫馨平靜而低調嘅婚禮，所以佢應寶貝仔要求，唔會廣發英雄帖，宴請佢班銀行同商界嘅朋友。以本港為家嘅艾爾敦，家中三名子女皆深諳刨冬瓜，呢位Andrew哥，亦曾在北京工作。
講番噚日場演講嘅開場白，敦哥勁讚寶哥哥是位萬能賓架，又做議員又興趣多籮籮，仲引述《李家皇朝》一書中，有關寶哥哥在劍橋求學期間，已識得book場搞派對生意，又為女同學打折，簡直係天生營商腦袋。