生命、審慎理財原則、健康、自由，都係啲孫柏文相信大家作為我哋特區市民，都覺得係非常貴重，甚至係「無價」嘅嘢，又適逢我哋個個都係理性嘅經濟動物（李卓人例外），清楚明白我哋唔會輕易攞以上嘅嘢來「校飛」（又係李卓人除外），所以每一次我哋見到有人願意「放棄」以上嘅四樣嘢，都覺得佢哋係非理性，只會話佢哋「一定係黐線嘅」。
其實好多時候，如果大家睇真啲，掘深一層，就會發現啲人願意「放棄」以上啲嘢嘅時候，其實只係我哋睇唔到願意「放棄」呢啲嘢嘅人，覺得有啲其他更重要、更「矜貴」、更「無價」嘅嘢，可以用以上，生命、審慎理財原則、健康、自由來交換。
嘥得唔怕嘥愈冇愈矜貴
花旗國科技評論員GeorgeGilder話齋，每一個年代想成功嘅公司或機構，都要盡量Wastewhatisabundantinordertosavewhatisscarce（浪費「充足」嘅資源，去節省「不足」嘅資源，嘥得唔怕嘥、愈冇愈矜貴）先至可以成功。所以今日，孫柏文就想為大家提供四個例子，希望可以幫大家啓發其他大家都見過嘅例子。如果可以，絕對歡迎來到《蘋果日報》網站，《金手指》網上討論區分享下。
1.生命：第二次世界大戰末，日本皇軍節節敗退，佢哋就係喺呢個情況之下，開始使用「神風敢死隊」自殺式戰術，叫冇經驗嘅戰鬥機機師，將載滿炸藥嘅戰鬥機，連人帶機撞向盟軍戰艦。就算明知將冇經驗嘅機師用極速訓練，加埋錫住用啲矜貴嘅戰鬥機，最後叫機師出戰放魚雷，擊沉盟軍戰艦達至最後戰爭勝利嘅成功率會高好多，皇軍都係照用「神風敢死隊」戰術，白白「放棄」士兵嘅生命。大家可能會話：「佢哋一定係打到最後，個個都黐咗線，仲估自己係肯切腹嘅東瀛武士，所以先至犧牲士兵嘅生命。」錯。咁點解佢哋會咁做？（答案在文章最後）
2.審慎理財原則：Google一間主要業務從事資料、數據儲存及發出嘅上市公司，一反電腦業超過五十年嘅傳統，大量投資落隨機存取記憶體RAM，而比較上少投資落去（每記憶單位byte）平99%嘅硬碟儲存harddiskstorage。大家可能會話：「Google一定好似特區富豪包明星一樣，錢多到唔知點用。」錯。咁點解佢哋會咁做？（答案在文章最後）
3.健康：有好多祖國沿海小鎮，政府同居民都清楚知道，如果長時間觸摸處理外國人嘅垃圾，會大大提高他朝患癌病嘅機會，不過佢哋都勇於輸入呢啲垃圾，循環再造。大家可能會話：「佢哋窮到唔怕生癌，為兩餐搏命。」錯。咁點解佢哋會咁做？（答案在文章最後）
4.自由：男人結婚。咁點解佢哋會咁做？（答案在文章最後）
答案：
1.當年，皇軍基本上已經冇燃油，所以要節省呢個「不足」嘅資源。當是燃油只足夠每架戰鬥機每月飛行兩小時，在呢個情況之下根本冇可能每日八小時訓練機師，跟住點可能仲可以飛來回行程放魚雷？所以，不如就叫啲機師飛幾小時嘅單向機程，希望有機會「撞」到啲盟軍戰艦。人命、戰機：充足、燃油：不足。
2.雖然金錢上harddisk平RAM99%，不過RAM就快harddisk一萬倍，即係計埋時間，RAM平harddisk一百倍。Google知道用戶搜尋資料嘅耐性先至係當今「互聯網世界」最「稀少」嘅資源，所以先至盡量投資落RAM。錢：充足、用戶時間：不足。
3.好多進口垃圾回收嘅沿海地區，就算唔係豐衣足食，都應該有兩餐溫飽，所以佢哋應該絕對「怕死」。不過，因垃圾回收所得多少少嘅薪金，就可以幫佢哋每一家人當中，畀一個人毋須工作。咁呢個「毋須工作」嘅人，就應該係家中「計劃生育」嘅獨仔獨女，畀佢哋讀書，希望佢哋他朝可以出人頭地。健康：充足、希望：不足。
4.算小弟不懂人性，我唔識呢個答案。只知道我聽過有人叫：「可不可能，還我自由？」