下屆勞顧會勞方代表選舉下月4號舉行，八方收到風，今屆勞顧會將大換血，五個經選舉產生嘅委員中，勞聯潘兆平、工團王少嫺，同埋已經退休嘅張國標今年都唔再玩，即係新一屆最少有三張新面孔。
今屆勞顧會勞資雙方為最低工資搞到水火不容，噚日已經入咗紙角逐連任嘅工聯會葉偉明同八方講，如果政府只肯以約章形式推行最低工資，勞工界會召開大會商討對策，並已去信邀請曾特首喺11月同勞工界對話。
講起最低工資，最火爆嘅非嫻姐莫屬，佢噚日接受商台訪問時警告，若政府拒絕立法制訂最低工資，佢會使出兩招撒手鐧，包括號召全港低收入人士申領綜援，同埋就政府拒絕引用《行業委員會條例》委任一個行業委員會訂出最低工資申請司法覆核，睇嚟曾特首有排頭痕。