股市牛氣冲天，電視上見到一眾股民普遍認為呢鋪差唔多到浪頂，沽好過買，其實股票同其他博彩或者投資項目沒有兩樣，你玩得這個遊戲，便要承擔一定風險；普遍投資者心目中只希望專家給予最佳的攻守策略，幾時賺夠要落車，叫人只沽咪買，你我也可做專家。
喺香港股壇，最精明嘅投資者可能就係買咗滙豐（005）長揸；叫得長揸，梗係唔理短期升跌，最好不斷泵錢去養佢，等十年八載收成啦；睇番呢隻大笨象嘅走勢，實在一啲都唔笨，啱啱噚日創新高（收市報145.2元），粗略用3年前10月3日禮拜五收市價（107元）計，連每年有5、6元息收，即投資3年有近5成回報(未計期間可能出現的攤薄效應)；好過信經紀叫你買乜買物基金靈活得多。
強隊等同藍籌股放長線
有咗一啲長揸必勝嘅穩陣回報，當然要喺投資路上尋求一點刺激同樂趣；賭波嘅大藍籌，各地聯賽嘅強隊是也。所以有同事取笑我上個禮拜五買科隆上盤輸錢也沒所謂，因為我實在沒有興趣放在該場嘅勝方艾遜身上，今次德乙升班大熱科隆輸波，咁下次咪……。
睇波賭波嘅樂趣，個人認為買「首球」不失為小注怡情好方法，我也沒興趣鑽研歐國盃外圍賽嘅形勢；不如推介英軍「重磅股」朗尼首球，有約4倍，做得箭頭，無理由成年冇波入，今場唔得，下場對克羅地亞再追！
文：蘋果波神