嘉里建設噚日喺開市之前突然停牌，原來係大股東郭氏家族出售股份套現，咁啱佢哋今年賣得如火如荼嘅中半山地利根德閣1、2座，同日又賣出一間，呢間仲要係破例未經翻新嘅單位。賣股又賣樓，唔通郭氏近排好等錢使？
嘉里揸住地利根德閣1、2座合共130個單位，一直出租，直至99年開始陸續拆售交吉單位，賣之前會先做好裝修，𠵱家賣剩唔夠20個，只有6個連裝修單位喺市場放售。噚日罕有地賣出一個未翻新嘅單位，美聯莊樹勤話單位係2座高層A室，3052呎，連車位成交價2308萬，呎價7562蚊，由於未經裝修，比現時連裝修放盤平咗100萬，買家急於入住，業主又唔介意提前賣出，雙方咪一拍即合囉。
地利根德閣1同2座賣咗7年，今年成交特別活躍，主要係嘉里積極出貨，過去半年賣咗20伙，以每個2500萬計，套現5億。