港澳辦副主任陳佐洱前妻許仁懿四年前癌病過身後，一直獨身，但據知佢最近再婚，搵到生命中另一個女人陪佢走埋下半生。據知陳佐洱對再逢第二春唔想太鋪張，都係靜靜雞喺上個月同新太太註冊，然後擺幾圍宴請親朋戚友就算。
有指陳佐洱太太係佢嘅家庭醫生，可能日夕相對嘅關係，互生情愫。64歲嘅陳佐洱有兩個囡囡，八方當然唔知新太太同陳氏寶貝女啱唔啱key，但肯定嘅係再婚無耐嘅陳佐洱非常happy。上個月隨自由黨訪京嘅立法會議員梁君彥話，當時見到陳佐洱，覺得佢特別容光煥發，春風滿面，好明顯心情極佳，原來佢當時正係新婚蜜月期，怪唔之得。人逢喜事精神爽吖嘛，陳佐洱呢期一定如沐春風啦。