在滙控（005）及中移動（941）兩大藍籌帶動下，港股逼近18000大關，恒指最高17940，收市17907，再大升278點，期指最高搶到上17985，收17979，高水72點。
滙控大升3.40元，好耐都未有咁威過。半個月前，推介滙控，當時恒指17512，滙控140.80元，好多大行都睇好滙控前景，目標價由150元到168元。呢個浪，炒滙控C輪，賺到笑。
佑威（627）急升後停牌，聽聞同一家大行達成協議，發一手可換股債券，佑威係第一次同大行及基金拉上關係，復牌後要昅實。佑威在中港已建立龐大的銷售網絡，好快可晉身成為中大型零售公司，最新消息係集團在歐洲亦已有所部署，日後若能成功打開歐洲市場，唔難會成為「小思捷」，大行同基金現時趁價低入股，日後可能賺幾個開。
光大國際（257）個勢真係好靚，噚日高收0.94元，升2仙，本周二升穿0.91元嘅徘徊區上阻力，短期好大機會見1.05元。
技術走勢改善
九洲發展（908）宣布年度業績前，股價曾升上1.02元，但宣布後就未好過，反覆下挫到0.78元才回升，噚日收0.83元，重上10日平均線，且升破下降軌，MACD亦出現「熊牛」入貨訊號，跌勢應已告一段落，短期反彈，股價可重上1元水平。
九洲業績其實唔錯，06年度（4月年結）營業額2.3億元，升6.9%；盈利3480萬元，升70.5%，每股盈利4.35仙，末期息2仙，另特別股息3仙，合共5仙，除息日期10月20日。
九洲係珠海市政府在港上市的窗口公司，在股權結構明朗化後，大股東將會注入優質資產，其中以旅遊及交通項目的機會較大。消息指公司在發展珠海度假村酒店別墅區同珠海賽車場土地資源，以及珠海公共交通運輸服務的研究已完成，好快會有進一步消息，對股價應會帶來刺激。
郭兆誠