商場𠵱家競爭愈嚟愈大，單靠大業主搞活動已難以突圍，為咗搵出個場仲要加啲乜嘢至能提高生意額，最直接咪問吓啲消費者囉。
將中商場引入影音店
新地代理租務部副總經理鍾秀蓮話，旗下將軍澳中心商場最近做過調查，發現被訪者認為個場若果加入影音店同書局就最好嘞。
蘭西聽完即時諗起地鐵喺隔籬嘅君傲灣商場君薈坊，正正有齊晒呢兩類店舖。又會咁啱嘅？你話商場競爭唔激烈都冇人信啦。
鍾秀蓮就話咁都冇問題，因為大家定位唔同，而且將軍澳中心商場有成40萬呎，走高檔兼多元化路線，就算遲啲呢區再多一個新商場開業都未驚過。佢仲預計將中商場遲啲會引入3至4間影音店。
家陣個場總共有129間商舖，已租出咗109間，呎租25至100蚊；今年續租商戶租金加幅平均15至25%，最高就有30%；其中約有14個商戶係畀緊分成租金㖭，難怪鍾小姐咁有信心啦。
佢再爆料話將軍澳中心商場今年頭9個月營業額達3億銀，比舊年同期升咗三成幾；淨係9月就有3000萬，多29%；至於黃金周同中秋營業額可以收到605萬，比舊年同期增加10%。
電郵地址[email protected]