適逢國慶黃金周檔期，旅遊界梗係望多啲自由行旅客來港；作為本港金融事務代言人嘅任總，亦乘機借題發揮，話希望內地可以開放擁有自有外滙嘅投資者也可「自由行」。相對於現時內地嘅QDII（合格境內機構投資者，即係內地嘅機構投資者經過審批可以出海外投資），華華姑且稱任總呢個新建議為「QDRI」吧（QualifiedDomesticRetailInvestor，即係內地散戶去海外投資）！
據任總嘅諗法，由於目前有政策限制，QDII未必能有效地紓緩人民幣升值壓力，於是佢順勢向內地有關部門獻計，建議讓擁有自有外滙，及懂得如何保障自己利益的內地投資者，自行到海外進行投資，以獲取較高的回報。
任總一向善於與內地財金官員打交道，為咗顯示出佢嘅政治智慧，佢仲話，上述建議正好與「藏滙於民」的政策一致，既然內地居民可通過「自由行」來香港旅遊，咁就讓擁有自有外滙嘅投資者亦一樣「自由行」吧。如此輕輕一提，唔知會否真的有下文呢？銀行公會11月訪京時，又會否認真提出建議？
講番人民幣滙價，某家連鎖零食店舖近日張貼告示通知客戶，該店已經接受人民幣付款交易，而且滙率是「一兌一」，但店舖講明，只接受人民幣十元或以上紙幣。在大眾市民心目中，人民幣兌港元滙價似乎已經是「一兌一」了。
不過，金融市場則估計，要再過三至六個月，人民幣滙率才會觸及7.80的水平。不過，根據金管局的內部統計學分析（任志剛強調，是用嚟協助金管局嘅工作而並非為了下賭注），人民幣在未來6個月首次觸及7.80的機會率是「五十五十」。即係開大定開細？咪即係冇結論囉！無怪乎，任總強調，各位可千萬不要因此孤注一擲。