呢排街上嘅日系水貨機幾乎銷聲匿迹，甚至售價時常波動嘅903SH，亦因為冇貨供應搞到炒上$4,000仍大把人買！講起日系機，近期網友冇再提SHARP，雖然佢新機多的是，但講到香港真正用到就一部都冇，毫無意義；反而好多人睇好呢隻松下嘅705P，佢哋估計就算數記唔諗住出，水貨佬亦可輕易解鎖咁話，唔少網友仲寄予厚望㖭！
睇番705P嘅規格，佢支援3G、配置200萬像素CCD相機、藍芽，查實都冇乜大驚喜，不過機身厚度僅14.8mm，玩番一按式自動揭蓋，而且仲提供6隻顏色咁豐富，睇落又幾型仔嘅！有網友就話，因為705P係採用早前P記嗰隻VS3及VS7嘅PhoneTools，所以成功解鎖機會應該幾大，唔似得SHARP咁每一款新型號，都用上新技術加密，搞到解鎖佬想偷雞都難！不過網友對705P嘅睇法只屬好壞參半，有人貪佢夠靚仔，亦有人又認為佢冇自動對焦比較失色。
記者：陳國輝
http://www.ima-mobile.com/