一年前Bandai出隻《高達戰術》，放棄《VS》系列回歸舊式操作，Fans唔習慣邊玩邊鬧。今年廠商夠膽依樣畫葫蘆，PSP新版《高達混戰》操作一樣又煩又複雜，不過終於加入《Z高達》系列機體，幾部變形機令2VS2更為激烈，推出首天已有大量機迷上網等開戰，高達搖錢樹果然仍奏效！
記者：陸俊雄
攝影：陳偉強
中秋開P必玩
高達遊戲最過癮地方，肯定係2鬥2同人死過嘅戰鬥。今次PSP隻《高達混戰》當然唔少得4人通訊對戰，喺街邊或地鐵入面，盡情即時決戰。筆者就喺首晚試玩時，跟同事喺地鐵月台埋頭對戰，最後更玩到唔捨得上車！
如果怕傷和氣，亦可選擇「協力」模式；4位玩家改為組隊打低電腦部隊，有時面對戰艦或重高達等巨型機體，勁考玩家嘅合作性。隻Game到港冇耐，網上討論區已有人廣招盟友，一齊用X-Link上網連線作戰，一時間對戰、組隊氣氛爆晒燈，最啱中秋攞去開P玩！
聯邦、奧干陣營
自護、泰坦陣營
Z高達首度登場
4人齊玩固然過癮，不過邊得咁易有4隻碟4部機？咁咪再冇買Game理由？非也，因為一部Z高達已叫Fans仆到去買！上隻《高達戰術》基本上只有一年戰爭同08小隊機體，今集故事背景由一年戰爭到Z高達年代，出現嘅機體達80部以上，足足係上集一倍有多！
變形機體係今集靈魂，Z高達、阿斯曼、密莎娜等變形機體更為吃香！雖然遊戲操作依然複雜麻煩，不過變形系統卻出奇簡單，只需按「×＋□」便可，比《VS》系列簡單方便得多，大大提高變形機體嘅機動靈活性，擔當進可攻、退可守嘅主力角色。
超巨魔霸踩死你
先前提過「協力」任務中，玩家有機會對付巨型機體。其實呢啲「重量級人物」都係今集新加，好似重高達、魔霸、天空之惡魔等巨型機體都會出現。好多對過重高達嘅玩家都話︰「打咗十幾次都輸，佢唔只快，出招力量又重，俾佢打四至五下就玩完，不過AI勁咗先至好玩，上集實在太易爆機。」
靠蟻多摟死象都打唔低巨無霸點算？唔怕，今集仲新加咗好多交通工具，助你奮勇殺敵，講緊嘅其實係啲大炮車。例如鍾意用渣古嘅朋友，可以坐上移動炮台「史高利」喪射；用百式又可以有米加粒子炮一擊必殺；唔曉飛嘅高達Mk-Ⅱ亦可以坐上大氣層專用嘅「當達爾」打空戰。
提到空戰，天空中子彈橫飛，固然係高達遊戲中重要戰鬥場景。不過今集《高達混戰》不安於現狀，一於由天空殺入太空，大玩宇宙戰。打對戰時，有月球、戰艦外等場景可供選擇，對於打慣沙漠、基地等陸上戰嘅朋友，係項新嘅挑戰。
PROFILE
遊戲種類：射擊＋動作
對應機種︰PSP
遊玩人數：1至4人
開發廠商：NamcoBandaiGames
售價：$268（普通版）/$278（連特典）
售賣點：I-Gamer（27253338）
地址：深水埗福華街福仁商場G16號舖
特典送馬沙金屬匙扣
