旅遊業甚為好景，旅遊H與老友於二十幾年前創辦嘅旅遊公司特別好景。呢間公司以前專做日本旅遊，樹立名堂之後就擴充營業至其他地區。旅遊H與老友兩人同是紅褲子出身，約三十年前去日本讀日文專科學校，學曉咗就做兼職，帶香港去日本嘅旅行團，帶帶吓，覺得幾好搵喎，於是專心做日本Guide；咦，仲好搵，發覺咁多香港人鍾意去日本旅行，呢行有前途，唔怕競爭激烈，只要做到口碑就掂。
於是儲起筆錢，返香港開檔，從小做起，開業之初除日本之外，乜都唔做。其餘就係歷史嘞，旅遊H間公司今年每季派二百萬元畀員工做花紅，第四季決定再派四百萬，合共全年派一千萬花紅，員工無不歡喜。問旅遊H：「派咁多錢做乜？」佢話：「呢行真真正正以人為本，冇人才就做唔到生意，即使有客上門，如果夥計唔在行，唔高興，都可以同我倒米趕客。做旅遊，如何請到好人才，留住好人才，係競爭勝負之分野。」
其實行行都一樣，不過旅遊領隊、帶街等人與旅客每小時接觸，如果唔掂，人客反應最直接，最快趣。旅遊H話𠵱家請人甚艱難，特別係日本線。去歐美東南亞，講英語點都會與當地人溝通到八九成，唯是去日本，英語唔掂，所有外語都唔掂，一定要講日語，偏偏日語唔易學，所以旅遊H索性不惜工本，抽調一啲其他旅遊線嘅領隊、帶街之中最有學習興趣嘅，送佢哋去日本學日文一年兼做實習，希望佢哋盡快掌握基本日語之後，加上居住日本一年，知道當地習慣，就可以擔任日本團領隊、導遊。
旅遊H呢條橋可能掂，可能唔掂，不過旅遊H信心十足，除加強培訓外，再有利誘，加薪兼花紅，如有夥計想鬆人，怕要諗過度過，轉工都會要求對方畀更大溢價。香港人去日本旅遊，百看不厭，三十多年來一向如此，相信在未來三十年，亦係一樣。