一個人住，雖然自由自在，但獨處斗室內，有時又難免覺得孤單，冷冷清清。從事醫療工作的何先生，喜歡家居整齊企理，居住的鰂魚涌單位，設計大前提是簡單舒服，惟不想太寡太淡，產生空虛感覺。設計師Zoe認為，用色是主要關鍵，白色潔淨典雅，全屋廳房及廚廁都可用，家具則以深色木造，色彩有對比卻無花巧，做到戶主簡單舒服又不覺「寡」的要求。
想將「寡」味進一步稀釋，地方較大的客飯廳，自然要重點布置，視覺豐富一點，就不致乏味。客廳一幅牆飾板，成為焦點所在，設計師於掛牆薄電視兩旁，添加大塊天然石，拼出模樣古怪又富驚喜的形態，我有我特色。
睡房做地台力求慳位
短小特闊的客廳石材牆飾板雖得意，但設計師嫌未夠搶眼，還於飾板下方，訂做青綠色地櫃，十分鮮艷，勢要吸引人。另一邊飯廳大櫃，刻意在中間抽屜處加插青綠色，與客廳地櫃相呼應。
兩廳注入色彩，變得有活力，這個家不太冷。套房小巧袖珍，要善用空間，建地台做床，既可瞓，兼可收藏雜物，床頭床尾更可做衣櫃及層架放電腦，每分每寸都無浪費。套廁地方狹小，拆牆換玻璃屏及趟門，內外通透，睇得清楚，倍感開揚鬆動。
記者：溫潤潔
攝影：司徒世華
設計、裝修及相片：DREAMHOUSE（27923286）
