八月十五是中秋，有人歡喜有人愁。今年中秋歡喜的當然是好友，而做咗淡友想唔愁都好難。
周三晚道指先低後高，以大陽燭升123點，確認破頂兼再創歷史新高。道指向上爆升，幫助好友昨日取得決定性勝利，即月期指愈挾愈高，最後升307點，收17979，同時帶動恒指升278點，收17907，不但一舉攻陷17800阻力，更直指18000關。
滙控倫敦見146元
橋唔怕舊，最緊要好用。昨日好友抽高大笨象滙控（005）衝鋒殺敵，滙控股價單日大升3.40元或2.4%，確令人有missionimpossible之感。實際上好友計算精確，善用借力打力的妙技，昨日以大裂口挾高滙控，並逐步推高股價，不少滙控C輪由價外變價內，窩輪發行商亦被挾埋一份，要因應對沖比率在市場補貨，結果在愈買愈升的滾雪球效應下，令大笨象升勢一發不可收拾。執筆之時，滙控在倫敦挾高至146.50元水平，睇嚟好友呢一波大象攻勢仍未完。
趙飛雲雖有造淡之心，但睇見如此場面當然不敢造次，但就會繼續留意大戶何時變臉轉造淡，事實上恒指已升近萬八，短期還可以去多遠？
聯康（690）公司輪545前日掛牌，昨趁好價在0.54元沽出派送的1.2萬份。
趙飛雲