雖然距離煲呔競逐連任仲有一段日子，不過大家已經玩緊估煲呔班底遊戲。政圈中人話，煲呔頭號馬仔、有橋王之稱嘅政務司司長許仕仁，雖然全世界估阿爺實迫佢再坐一會，但據知直到前晚，肥龍仲誓神劈願話準時07年6月30日深夜收工，絕對唔做多一分鐘！不過佢老哥要再坐多一兩年呢單嘢，已經好多人當係真。八方最近聽聞，教統局局長李國章個大佬李國寶，已經周街幫細佬搵新工。
其實煲呔心目中，始終想搵公務員做呢個特區二把手。有煲呔身邊心腹話頭，煲呔覺得政務司司長個位，始終係由公務員出身做最好，搵外面入嚟嘅局長做，已經差咗一皮，若然搵個唔識政府嘅人做，就更加冇可能！由此分析，梁振英就諗都唔好諗；唐公子、阿瑟王只係次選；鬍鬚佬曾俊華，先係煲呔心中最愛！
唐唐無望再上層樓
江湖傳聞，唔知係咪阿瑟王深知做特區二把手無望，已經無心留戀官場，諗住做埋呢幾個月就拜拜。雖則李家貴為香港最後的貴族，佢就算真係唔諗搵工跳槽，都唔憂柴米，仲分分鐘可以豪過做局長嗰陣，但係長遠嚟講，始終都要搵份工消磨吓時間，於是佢大佬李國寶周圍同佢睇吓有乜嘢工啱佢做。不過，你知阿瑟王份履歷點猛料喇，做過醫學院院長、大學校長、連局長佢都做埋，啱佢身份嘅工，你估真係買份報紙、走去勞工處就搵到咩！
所以李國寶都好頭痕，事關搵咗咁耐，好似都冇乜工啱佢細佬做。呢個又唔出奇，你知江湖之中，配得起阿瑟王今日身份嘅工，一係做跨國大機構話事人、一係獻身祖國做京官，再唔係就做國際組織阿頭，呢類工就真係可遇不可求，就算李國寶夠把炮，都唔係話有就有！
不過，有官場中人話，特區「冧巴吐」呢個位，始終唔到煲呔話事，正如肥龍做特區二把手，都係煲呔經中央「提醒」之後，先嗱嗱臨搵肥龍出山。由於阿爺已經明示暗示鬍鬚曾未夠班，若然肥龍真係牙齒當金使，踏正07年7月1日拜拜走人去睇歌劇，煲呔焗住要搵次選，佢一定搵阿瑟王，事關煲呔上次去中大演講已經講到明，商人唔啱做特首，唐唐又點可以更上一層樓？