世界盃亞軍法國周六喺歐國盃外圍賽作客蘇格蘭，原本以佢哋銳勢，贏多一場不難，不過從陰謀論睇，法國有充份理由唔贏，不妨冷敲佢哋上半場領先，下半場被迫和，開個客/和。
法國係B組已經兩戰兩勝，特別主場擊敗同組勁敵意大利，出線有晒主動權，今次對住又有6分在手嘅蘇格蘭，贏埋真係差唔多出線咁滯；不過賽制上一組前兩名出線，法國當然最唔想意大利出線啦，話晒世界盃決賽先輸過畀佢，今次送1分畀蘇格蘭合理；𠵱家法國仲有好多老將，可以博佢哋上半場領先，下半場莫氣下被迫和。
斯軍防守硬淨有保證
威爾斯雖有比拿美、西蒙戴維斯呢啲英超名將壓陣，不過攻擊力始終一般；今仗威爾斯主場出擊，對斯洛伐克，海外莊家都只開出平手盤，證明對威爾斯信心不大。斯洛伐克係近年冒起甚快嘅東歐球隊，世界盃已經爭啲出線，防守力亦有保證；預料斯軍作客都唔大貪，望1分收貨，半全場博和/和，希望頂到尾啦。
葡軍發炮吼「主其他」波膽
葡萄牙上仗大意作客失分畀芬蘭，主場對住阿塞拜疆，真係唔可以再失。以葡軍中前場好似廸高、基斯坦奴朗拿度、沙保沙，個個射得，阿塞拜疆勢成發洩對象，波膽「主其他」冇走雞。最後丹麥重組後，已漸見起色，上仗作客都贏冰島兩蛋，湯馬臣、羅美度係國家隊好fit；今次主場對住北愛，北愛入球能力幾乎係零，只係睇下丹麥入幾多粒，小弟就博丹麥再贏2:0嘞。文：牽牛