眾人期待已久嘅索愛PDA旗艦機P990i，水貨喺機場浸咗一輪之後，本來預計行貨喺10月中或者月尾先見街，不過日前就有好多網友話已經見到真身，更奇怪嘅消息係行版竟然支援簡體顯示，唔可以睇繁體。究竟係咪索愛方面擺咗個大烏龍呢？
筆者亦親自走去機場問個明白，點知當行到店舖玻璃門之際，俾我發現一張設計普通、並寫上簡體字嘅P990i宣傳海報，睇落唔係出自香港索愛手筆，不過Sales就話：「呢張海報係香港SonyEricsson畀我哋㗎！」更令筆者感到莫明奇妙，呢批機僅支援簡體中文，完全唔係香港玩家想要嗰種。有Sales解釋，其實索愛係想趁住「十﹒一」黃金周呢段時間催谷生意，所以先推出一批簡體版手機咁話！至於繁體行貨幾時先有得玩，筆者曾經向公關查詢過，結果答覆係未有期，P990i嘅擁躉可能又要等多一排喇！
記者、攝影：尹謹基
售賣點：T-OneMobile（26289090）