打從第三季開始，發展商陸續發力推售新盤，誓要追回上半年失地。7、8月份開賣嘅灣仔嘉薈軒、馬灣珀麗灣、將軍澳城中駅及土瓜灣翔龍灣，銷情確實唔錯，但熱鬧過後，9月應市嘅筲箕灣御景軒，以及近期推出嘅灣仔尚翹峰，都好似後繼無力。呢個現象，令網友「11大頭仔11」質疑，市場係咪已經唔夠買家去接貨呢？
11大頭仔11喺《香港討論區》上指出︰「近兩個月，發展商係咁推盤，吸咗唔少買家，我估大部份係用家。之後三個月發展商再推盤，唔知仲有冇咁多用家買呢？用家係咪咁源源不絕呢？而炒家我諗都冇子彈入貨囉！」
abcpqr就大罵︰「揠苗助長找死而已，刻舟求劍更枉費心機，樓市低沉亦係官商一手造成，一面倒的高地價政策，根本脫離現實，只顧地產商利益而不顧買家應有權益，亦係作法自斃的結果。」
dbp認為︰「有能力買嘅已經被一手盤吸晒，二手盤樓價冇乜變化但無成交，業主係咁亁坐，要出貨就只可以以「超筍價」先出到，咁樣落去只會令成交價一路跌落去…出年啲居屋又吸走啲低價盤，變成高低價盤都冇晒買家。」
購買力恐被吸亁
網友fwho對此大表認同︰「呢個就真呀，想等個價跌而成交，就真係唔係出年嘅事啦，不過𠵱家嘅二手成交量相對舊年同期已經大跌七成，業主唔肯減價，買家又唔肯追價，大家都企喺度。要有番成交，一係就大升，一係就大跌。」
有悲觀的網友更加相信樓市有大跌嘅危機。yiuallan話︰「我都覺得好危，𠵱家講兩成可能有人話我誇張，出年年尾可能d人話今日個價，點會有人買。」
fwho就說︰「正路都係嘅，不過就未至於collapse，跌5至10%就應該要㗎啦。collapse係要跌2成以上，出年都冇乜可能會係咁㗎…一係又出多隻新病毒啦…。」