消委會都算係幾有公信力嘅機構，做得主席呢個位嘅，應該都有番咁上下。剛剛上任差唔多一年嘅主席陳家強話，佢呢一年經常成為朋友嘅投訴對象，唔係投訴佢，而係向佢講平時生活上遇到有關消費嘅不滿。不過，咪以為陳主席嘅朋友可以近水樓台先得月，因為主席都係畀個消委會投訴電話號碼佢哋咋。
陳主席好坦白，話自己以前精明消費嘅意識唔高，仲曾經俾啲影視店呃過，「咪就係買咗啲租影碟券之後，間舖執咗囉，但蝕咗幾百蚊啫。」之後仲要冇去投訴㖭，佢解釋係因為以前好少去投訴。
講開又講，消委會收投訴嘅部門已經由北角嘉華國際中心搬咗去附近嘅柯達大廈14樓。總幹事陳黃穗話嗰度4,000幾呎，用咗千幾萬嚟買，「呢排仲裝修緊，沙塵滾滾。」話遲啲先帶八方去昅昅。