日本和食碟碟$10？好抵；店舖佔地6,000呎、有250個座位、有條將近60呎的長走廊，好大。有心幫襯唔該留定肚，食完一轉覺半飽就嚟番個60呎踱步，懶理旁人側目，唞唞再喪食第二Round，咁就抵上加抵。知你懶，幫你剔埋紙仔點埋菜，食齊以下推介9碟$100落樓，仲想點？
記者︰方綺君
攝影︰譚盈傑
模特兒︰Mavis、Michelle、Danny、花仔
a.紅酒薯仔煮牛尾$10
不但傳統日本和食，加入西式元素的和食都有得揀，牛尾燜得軟腍，有淡淡紅酒味，薯仔亦唔會一咬就散。
b.鰻魚炒飯$10
每枱必叫，雖然鰻魚份量唔多，但加鰻魚汁炒過嘅炒飯超香口惹味，份量足夠一個人食飽飽。
c.軟殼蟹卷（前）、沙?魚天婦羅各$10
$10一碟的壽司和天婦羅最受歡迎，皆因件頭夠大絕不取巧，軟殼蟹卷係原隻蟹仔唔係蟹碎，沙?魚天婦羅亦唔會脆漿多過肉。
d.火燄蘆笋半生熟牛肉壽司（前）火燄帆立貝海膽壽司各$10
賣相高檔，估都估唔到只賣$10，雖然$10只得一件，不過同其他舖比較，呢兩款壽司起碼平一半。
e.蟹子雞肉炒飯$10
新菜式每月有，蟹子雞肉炒飯是其一。炒飯拌幾粒炸雞、幾條紫菜同新鮮蟹子，口感好得意。
f.雪花牛肉鍋$10
$10就可以食到個牛肉鍋，咁抵，難怪枱枱都會Order，鍋內有金菇、冬菇、鮮菜、魚片和大大塊牛肉，我都撐抵食。
咖喱魔鬼魚$10
最新出品，魔鬼魚略煎加咖喱汁一齊煮，有好重咖喱味，而且肉質嫩滑啖啖肉，未食過魔鬼魚一定要試試。
售後服務有誠意
叫大家踱步慢跑再食第二Round純粹講笑，不過一踏進「浜」，見到條長長走廊，我的確聯想到可以嚟番個60米踱步，消化完再擦第二Round，全場碟碟$10咁抵，食多一Round半Round有幾出奇？可以做到全場$10，因為店方大量入貨，每次入貨，都比一般和食店多5至10倍，拉番開條數扯番低成本先可以碟碟咁平。數最受歡迎菜式，則非雪花牛肉鍋同加州卷莫屬，每日可以分別賣出300份同200份，玉子雞翼都係顧客至愛之一。
負責人劉經理話︰「我哋剛剛開張都無乜客，𠵱家開始旺場，因為我哋搞埋售後服務。」何謂售後服務？「我哋已經儲咗500個顧客電話，每推出新菜式，都會Send短訊、E-mail或者打電話通知客人。」想幫襯，一定要訂位，我試過由中午12點打電話打到下晝2點幾，個電話都唔通，睇嚟真係好多人訂位。呢間舖喺香港討論區設有論壇，客人可以提供意見同自由討論食物質素。劉經理放工都有排忙：「我今晚返到屋企都要上網回覆客人。」有咁嘅服務態度，又幾OK喎。
食客有Say
Tony︰「味道OK，價錢抵食，叫多Round都仲得。」
Joyce︰「好抵，我食得清，鍾意牛肉鍋味道唔太濃，第一Round兩個人叫咗6碟，一陣會食多Round。」
Matthew︰「第一次幫襯，鍾意食三文魚壽司，好多嘢食好飽。」
林先生︰「我食秋刀魚同咖喱魔鬼魚，另外壽司$10好抵食。」
搵食攻略
浜$10の專食店（23751232）
地址︰尖沙嘴亞士厘道24-38號天星大廈地庫
交通：尖沙嘴地鐵站A1出口
營業時間︰11:30am-11:30pm 座位︰250位，周五、六及公眾假期須兩日前訂位
