「睇靚女？去砵蘭街啦。」喂，唔好心邪，唔係嗰啲打扮妖艷嘅「搵食」靚女，係砵蘭街「八仙樓」老闆3個女，個個青春少艾笑容甜到漏。老實，事關太多色情架步，我女仔之家好少亦唔多敢蒲砵蘭街，唔係邊爐精編輯報料，我打死唔會去「八仙樓」。推門，見21歲大家姐Wincy同20歲二妹Winnie，果然卜卜脆，可惜採訪當日三妹靚雪無蒲頭，否則幅相仲熱鬧。
Wincy話︰「我間中客串落場幫吓手，二妹就長駐舖頭。」話晒間舖喺紅燈區，多唔多麻甩佬撩你哋？人稱得意妹嘅Winnie就話：「唔可以話無，但亦唔會經常有，撩得最多嘅咪係你編輯囉。」落場幫手會唔會特別受歡迎？兩姊妹笑一笑︰「哈哈，唔可以叫特別受歡迎嘅，咁我哋始終係全場最後生嘛，實會同啲客傾多幾句。」離題問一問，後生細女，「八仙樓」地點又咁就腳，唔使做嘅會唔會去番旺角行街？Wincy答︰「唔會，平時行街會去銅鑼灣同尖沙嘴比較多。」大家喺「八仙樓」見唔到兩位靚女，去銅鑼灣同尖沙嘴碰吓運氣啦。
記者︰方綺君
攝影︰林栢鈞
黃金糯米蝦$68
海中蝦用黃金蝦做法，沾蛋黃碎炸咬落脆卜卜，糯米飯淋過豬油，所以特別香滑，唔會食到成嘴黐𣲷𣲷。
黑椒脆皮炸豬手$68
勁受歡迎菜式之一，原隻鹹豬手開脆漿炸，有齊外脆內腍兩種唔同口感，豬手好入味，點特製黑椒汁食，好味程度倍增。
鹹蛋焗肉餅$42
唔同中式鹹蛋蒸肉餅，改用西式方法焗15分鐘至全熟，中間有原隻鹹蛋黃，味道唔會過鹹唔送飯就咁食都得。
食客評分（10分滿分）
客仔Ray話︰「可唔可以畀11分呀？有靚女落Order，會叫多啲嘢食。」
送貨阿峰︰「畀10分。我最鍾意送貨去八仙，因為有靚女睇，得意妹個樣好鬼死得意。」
新八仙樓海鮮酒家（27701111）
地址︰旺角砵蘭街109號地下