港股昨日嘅波幅只有151點，恒指埋單升22點，但係成交就有431.9億元，即市波動大，好淡大戶各不相讓。
前晚美股創新高，昨日早市日股又造好，但係港股班大戶好友都無辦法砌個市上去，一時間令到個市嘅氣氛幾淡，班淡友威咗一陣之後，啲買盤又湧番晒出嚟，轉身慢嘅炒家自然俾人左一巴、右一巴。好淡對決已到，單邊市嘅升跌幅都好和味，入市博個市大升或大跌，都唔使咁心急，最緊要就係做好風險管理，作兩手準備。
華能C輪2446：上個月中曾經推介過隻華能C輪，當時正股（902）企喺5.30元，昨日曾見5.95元5月初高位，收市報5.87元，啲油價跌咗咁多，但係啱啱先跌穿咗59美元，成個技術走勢圖差晒，油價下跌好似跌咗落無底深潭，睇遠啲，一定對華能嘅盈利有好大幫助，難怪啲買盤追得咁心急，升破6元之後，華能短線起碼要試6.30元。
隻華能C輪2446昨日收44.5仙，槓桿率13.2倍（有效7.4倍），仲有159日先到期，溢價7.9%，引伸波幅26.8%，對沖值0.56，正股升上6.30元，2446應該喺70仙樓上，就算喺6元有壓力，隻輪都會見到52仙，現價買，正股穿5.70元止蝕。
華能C輪9541：9541上次介紹過，𠵱家個價喺57仙，槓桿率10.3倍（有效7.5倍），成交活躍啲，正股升上6.30元，9541應該會逼近90仙，止蝕參考同2446一樣。
俊 樺