當機仔DC已發展到千萬像素，今時今日再提CCD解像度都只係數字遊戲，唔夠實際。其實細機最能吸引用家，仍然首推功能同便攜性，剛剛就有Canon同PENTAX兩大品牌同期推出細機DC，無獨有偶大玩人臉追焦，不過PENTAX加入三大技術防止手震，比Canon不設任何防震更出位！
記者：許福合
攝影：何家亮
ImageGirl：Winnie
IXUS900Ti 遲來的追焦
Canon喺上年於日本舉行嘅CanonExpo中，就曾展出過自家開發嘅人臉對焦技術，特點係除咗能自動搵出畫面上人臉並且對焦外，當人臉移動時仲可以追住對焦，咁嘅設計即使對住幾好動嘅Model影相都無有怕！當時諗頭的確非常新鮮，不過估唔到隔咗成年之後先有對應呢種技術嘅900Ti推出。呢段時間好多品牌已經推出咗相似功能，好以富士S9600fd更可以對勻10塊面，俾人攞晒頭彩，好彩900Ti嘅人臉對焦特點係可以追住對焦，論實用性比一般機種都強！
900Ti雖然係薄機IXUS系列，不過解像度都達到千萬像素級別，要彈係今時今日新機中竟然無防震功能，抵鬧！光學變焦亦係標準三倍（37~111cm），還好ISO可以去到3200，都算係加番啲分。
900TiPROFILE
感光元件：一千萬像素CCD
變焦：3倍光學、4倍數碼
屏幕：2.5"
記憶卡：SD/MMC/SDHC
電源：專用鋰電
體積：91.2×59.6×28.2mm
重量：165g
查詢：CanonHK（21702888）
OptioA20 軟硬齊防最穩陣
PENTAX喺細機之中，都算首部具備「三防」功能，不過呢三防並非指防水防撞嗰種，而係CCD移動修補影像、減低影像模糊（即軟件修正）及短片防手震三大防震功能。首先要提CCD移位修補，透過感應器可以偵測出相機晃動情況，再從CCD移位來修補相片，類似防震設計一般只出現嘅高檔DC身上，今次「下放」到機仔身上，確保到一眾鍾意玩SnapShot玩家，隨隨便便一舉機就可以拍到「實淨」相片，另外再配合軟件式減低影像模糊功能，軟硬兼施雙管齊下，影相自然變得易影好多！另外，A20亦有埋人臉追焦功能，不過與Canon設計有啲唔同，A20當㩒住半下對焦時，就會鎖定人臉追住對焦，而Canon即使唔㩒掣，亦會自動偵察到畫面內嘅人臉，同樣可有追焦嘅效果。
A20PROFILE
感光元件：一千萬像素CCD
變焦：3倍光學、4倍數碼
屏幕：2.5"
記憶卡：SD/MMC
電源：專用鋰電池
體積：89×55×23mm
重量：145g
查詢：捷成洋行（29262987）
5關實戰較量
第一關：鬥的骰
卡片DC梗係要夠輕巧的骰，首關就梗係比一比兩者機身大細同厚度啦！
第二關：追焦準確度
人臉對焦乃DC界新趨勢，今日呢兩部DC仔更識得追住人臉對焦㖭！當模特兒周圍走時，人臉追焦就非常好用，兩部機追焦功能最主要分別係900Ti隨時追焦，而A20就係㩒半下快門先開始追。功能差唔多，不過論速度同準確性，就以900Ti比較優勝，人臉對得準，A20有時追錯焦，例如會用咗模特兒個拳頭嚟做Focus。
第三關：陰暗環境
當去到光線不足地方拍攝時，要使用人臉對焦拍攝，兩機拍攝上問題都不大，不過經多次拍攝，發覺900Ti似乎喺暗位拍攝時，鏡頭反應比A20稍快，Canon始終有一手。
第四關：相片質素
喺全自動模式底下，相片背景同樣都有過度曝光情況，兩者相比之下以900Ti顏色比較好，睇模特兒膚色較為自然，A20顏色整體則較淡。
第五關：屏幕鬥光
兩部機同樣用上個2.5"芒，不過當拍埋比較，以900Ti比較光猛，而顏色同解像度就差唔多。
PENTAX出防震絕招
由於Canon900Ti不設防手震功能，所以呢Round畀PENTAXA20威晒。測試以手持相機及走動時作拍攝，可見到A20喺軟、硬兩大防震系統支援下，相片由鬆散變成實淨，若果拍攝之前開埋預覽睇效果，更係實食無黐牙！
總結
論兩者外形，真係A20贏晒，雖然兩部機都用上金屬殼，不過A20細細部，自然比較容易得用家歡心。至於兩者主力賣點人臉對功能，則以900Ti整體對焦速度同準確性較出色，不過A20又具備有完整防震功能，隨時拎出來玩SnapShot都唔怕手震。至於邊部啱你，就睇你多唔多影人，影人揀900Ti，一般拍攝則可選A20。