地產L捐獎學金畀大學生，已有十幾年歷史，今年一位得獎者來自內地，因為生活困難，學校得到地產L同意，獎金增加一萬元。學生寫信向地產L致謝，內有一句：「一萬元於先生如九牛一毛，於我如千斤重。」雖然語帶誇張，中文信係咁嘅嘞，唔使介意，但地產L就唔鍾意「九牛一毛」一詞。地產L話：「我雖然有錢，但錢唔容易賺，一萬蚊肯定唔係我嘅九牛一毛！學生來信，只須寫一句多謝就得啦。」
地產王最近亦捐咗兩百萬做獎學金，一啲人講佢：「二百萬係你嘅小數目啫，如九牛一毛！」地產王對佢哋如此回應：「二百萬唔算少，唔係九牛一毛。咁嘞，二百萬佔我身家某一個百分比，我可以透露呢個百分比，請大家按呢個比例捐出你哋嘅身家一部份。」此言一出，冇人再出聲。批評別人孤寒容易，自己捐錢就好難，此乃人之常情，聰明啲就唔好月旦人哋捐錢多少。
香港時興投訴文化，投訴人哋捐錢少，投訴人哋人工高，投訴人哋有獎而佢冇獎……呢日聽旅遊M講故事，笑到碌地，奇怪香港點會有人咁好心機去投訴一啲小事。旅遊M話一位仁兄拎一張唔啱日期嘅抽獎券去參加購物大抽獎，一間大零售店拒絕佢參加，呢位仁兄就周圍投訴，電話最後去到旅遊M度，竟然講足四個鐘頭（因投訴人點都唔肯收線），粗口出齊，旅遊M都奇怪呢位仁兄點解返工唔使做嘢。
大編輯亦不時收到無謂投訴，有時投訴人粗魯不文，大編輯不勝其擾，後來諗出一個方法，就係對投訴人講：「先生，現在我哋開始錄音，以備他日與俾你投訴嘅對象核對事實，請你開始講……」咦，試過幾次，投訴人一聽電話要錄音，立即窒晒，粗口失蹤，大編輯為之耳根清靜，大編輯話現在啲投訴者開口埋口就話要寫信去特首辦、廉署、新聞署、廣管局……總之全世界都去勻嚟投訴，執着心態好重。為何如此，要請社會心理學家調查研究。