張栢芝同謝霆鋒呢對新婚夫婦，連續幾日高調表演真人騷，日前霆鋒接受訪問時，又事先張揚話會同契女、即係陳奕迅（Eason）同徐濠縈嘅寶貝女康堤慶祝兩歲生日。
自認「一擊即中」
噚日下晝，霆鋒同栢芝分頭去到深灣遊艇會同契女開生日會，栢芝坐保母車到場，原本諗住喺正門落車，一見到有記者即刻拉簾，然後直駛去停車場，冇耐霆鋒就喺正門入嚟。除咗霆鋒兩公婆之外，何超儀同陳子聰、琦琦同女兒，鍾鎮濤同女友范姜等都有到場。到夜晚7點幾，記者隔住玻璃見到徐濠縈抱住個女，霆鋒同栢芝一齊喺遊艇會嘅露天酒吧飲嘢傾偈，而Eason呢個時候就接老竇陳裘大同外婆到場。落車嗰陣，Eason見成大班記者圍住影相，即刻發晒𤷪𤺧話：「你哋小心啲得唔得呀？」至於問到霆鋒係唔係就嚟做老竇，佢話：「都話唔係咯！」
另外，霆鋒噚日接受電台節目主持人查小欣電話訪問，查小欣叫霆鋒點首歌賀自己新婚，佢笑笑口話：「咁就點我嘅歌《一擊即中》啦！」之後仲陰陰嘴笑，再次暗示自己快做老竇。問佢如果有小朋友嘅話會唔會返加拿大定居？佢話：「都會㗎，嗰邊空氣好啲嘛。到時可能我要做太空人，太太就湊仔囉，我講到好似有咗咁，哈哈！」
