上個禮拜五，摩根士丹利亞太區首席經濟師謝國忠突然離任，𠵱家距離攞年終花紅日子不遠，點解佢走得咁急呢？
謝國忠喺大摩將近10年，主要負責經濟研究，應該不會導致公司「輸錢」，究竟佢離職嘅真正原因係咩？言論過於出位？抑或與同事意見不合？
財經雜誌《FinanceAsia.com》噚日報道，國基會/世銀會議9月中喺新加坡召開後，謝國忠曾經寫過封《對國基會/世銀會議的一些觀察》嘅電郵，send咗畀公司內部指定人士傳閱，但其後漏咗出街，搞到區內（?）互相傳閱。
謝國忠喺電郵提到，今屆國基/世銀開會，場地選擇新加坡，令佢覺得有啲奇怪，新加坡GDP過去10年並無改變，同期，中國增長3倍，佢認為，個會應該喺中國或者印度開比較適合。
報道話，謝國忠進一步指出，市場人士雖然大讚新加坡係全球化嘅成功典範，但佢覺得，新加坡之所以成功，主要係作為印尼政府同商人洗黑錢中心，但係印尼𠵱家冇咩錢，所以新加坡經濟麻麻地。為咗保持經濟增長，新加坡惟有起賭場，吸引中國貪污活動嘅黑錢。
大摩發言人話，封電郵係個人意見，不代表公司立場，公司一向支持新加坡，而且相當尊重新加坡嘅成就。
與此同時，華華再翻查近期謝國忠嘅公開言論，發現佢喺上述會議召開期間，曾經接受傳媒訪問，話由於通脹壓力，會令美國明年借貸成本上升，美國經濟08年有機會陷入衰退。大摩首席經濟師羅奇（StevenRoach）即時回應話，佢並不贊同謝國忠嘅看法。
謝國忠同羅奇同樣來自大摩，點解立場有出入？而且甚至達到公開化地步？確實有點耐人尋味。