之前有傳話韋斯咸會俾人收購，所以先至有「阿根廷孖寶」空降鋪定後路嘅傳聞；不過最近俾我求大俠收到風，話說會方諗住取消呢單買賣，所以即刻有傳馬斯真蘭奴同埋泰維斯會喺出年1月嘅時候被賣走！故勿論呢單嘢真定假，但可以肯定「野獸」嘅前景一定唔慌好！
話說泰維斯加盟時候「暗盤」條約話明佢如果健健康康就一定要派佢上陣，令到柏度排陣焗住用佢，又搞到球隊士氣低落晒。我求大俠就唔敢講泰維斯名過於實，話晒佢嘅球技、速度同埋爆炸力係有嘅，不過令唔少人大跌眼鏡又係真嘅。所以𠵱家坊間傳聞話會方拒絕賣盤嘅話，我諗「韋咸」fans肯定飲得杯落！
泰維斯細佬藏械被捕
不過泰維斯到家吓都未開齋，搞到喺主場比賽都有唔少人「開汽水」柴佢台，而且佢嘅黑氣仲「感染」埋佢身邊嘅人㖭！話說佢親細佬廸亞高同個老友喺阿根廷首都布宜諾斯艾利斯遊車河時，竟然俾警察喺部車度搜到武器，而且仲唔係普通嘅鐵通刀仔，而係可以「食大茶飯」嘅手槍之類既「大殺傷力武器」，結果梗係俾警察叔叔「塔」咗返差館啦！
「所謂樹大招風，泰維斯個細佬驚俾人綁架陀住『架生』自保其實不足為過，不過好似殺傷力咁大嘅武器旁身點都講唔通，一旦殺錯良民咁點算呀！」