香港財務策劃師學會，噚日喺會展舉行財務策劃師獎頒獎禮，請咗不少名人高官做嘉賓，財經事務及庫務局局長馬時亨，同港交所行政總裁周文耀都係坐上客，不過，唔知係咪馬局長要同傳媒打好關係，等班記者寫少啲黃金周嘅影響，所以企定定，同記者傾足15分鐘，但係周總裁就淨係笑笑口，冇咩特別嘢講，急急腳走入會場。
馬局長都幾幽默，一見到記者等佢等咗咁耐，就即刻停低，仲講笑話，以為淨係會見到主辦單位南華早報嘅記者㖭，見到咁多記者都好surprise。記者嘅問題，大多圍繞財經，馬局長亦都一一作答。例如有關上市規則法定地位，佢就話證監會、港交所同律政司已經傾緊，希望下一個立法年度可以提交立法會；最近社保基金到香港投資，佢就話，呢個一定係好消息，一啲都唔擔心一個戶口足以影響香港股市，因為香港個市日日都有成幾百億成交，邊會咁易俾一個戶口波動到吖。
不過，社保基金呢排都係沽緊啲啱啱上市嘅新股招行同埋海油化學，次次都係當日最高位，搞到兩隻股都由高位回落收市，照華華話，馬局長呀，對成個市影響可能唔大，但對一隻股影響都咪話冇。