小小超舊年底未能成功將SUNDAY（866）私有化，事隔10個月捲土重來，先收購SUNDAY所有資產，再將所得現金以特別股息派發，將空殼公司除牌後，就等於「曲線私有化」，由於唔使9成股東投票通過，加上已獲華為支持，相信今次成事機會十分之高，諗得出呢條「橋」，都算一絕。
搞掂咗SUNDAY，市場憧憬下一個私有化對象係盈科保險（065），噚日股價升咗5.9%，過去兩個交易日，升幅接近一成。經紀話，與其傳私有化，不如話佢賣盤機會仲高，因為連公司主席都講過唔排除賣盤，另外今年中亦傳過有中資保險集團睇中盈保。
保險公司估值係以內在價值計算，例如今年初國衞收購MLC萬誠保險，就以內在值1.5倍作價。根據年報，盈保去年底止內在價值為4.947元，年報仲話如無意外06年盈保內在價值仲會繼續大幅增長，噚日盈保收4.30元，如果賣得成，應該仲有水位。
達成10日升1.35倍
達成集團（126）近兩個多星期升得好勁，噚日再升17.9%，已經連續出現咗10支陽燭，呢10個交易日由0.53元急升至1.25元，累積升幅1.35倍。
呢隻股因乜事升得咁勁，自然好多人想知，但問好多證券行都話唔知。如果炒折讓，𠵱家折讓亦已唔大，莫非係炒旗下佳寧娜酒樓月餅賣得好？
歐陽風