好友昨日又係用中移動（941）翻身，尾市一度挾高股價至58元，最多升2.05元，但高位獲利盤蜂擁而至，急退回57元收市，仍升1.05元，為恒指貢獻65點升幅，令港股扭跌為升22點，大有「中移動當關，淡友莫敵之勢！」
不過，中移動雖創出00年11月以來的新高，但日線圖高位出現十字星，9RSI仍未破背馳利淡之勢，加上現價往績PE19倍，預測18倍，睇嚟已被好友搾亁得七七八八，好友要繼續挾上，必須要滙控（005）扶助，滙控近期在142元阻力位徘徊，並未積極參與好友的攻勢，究竟係蓄勢以待還是已行人止步，相信今日會有分曉。
其實昨日好淡戰況相當激烈，由早市一直纏鬥至收市，恒指及期指雖扭跌為升，但這一回合的勝負仍未分，而周三晚美股的走勢將起決定作用。
道指周二晚終於創下11758的歷史新高，而且高位沽壓不大，只退回11727收市，以陽燭高收，升57點。如果周三晚道指能大幅升穿保歷加通道頂11774，並守在其上收市，則短期升勢未完，可帶動港股先挑戰17800。
形勢漸有利造淡
另一方面，形勢漸有利造淡，若道指周三晚出現見頂回吐的走勢，相信港股亦會順勢調整，可伺機先買入1/3注恒指P輪短炒，策略上是跌穿20日線（現處17363）加1/3注，再跌穿保歷加通道底17000加1/3注，恒指P輪揀2410，主要是莊家售後服務佳，買賣盤貼價及跟足指數升跌。H指P輪則揀3880，理由同上。
趙飛雲