道瓊斯工業平均指數創出歷史新高，花旗國各大報章、傳媒機構都紛紛大字標題，幫各位股民「慶祝」。啦啦隊隊長當然就係千禧年被叫做「派對台」partychannel嘅CNBC財經新聞台，同埋《華爾街日報》，CNBC首先派出佢哋啲主持人「跳舞」，《華爾街日報》就寫社論話「道指新高=花旗國經濟力強」。
不過，孫柏文今日要用隻金手指篤爆呢啲「非理性亢奮」。首先，真正反映花旗國股市嘅標普500指數，仲有排先至可以挑戰「泡沫年代」創出嘅歷史高位，道指前日嘅新高，根本就係「建制」夾硬篤出嚟嘅假象。因為普通花旗國人只會留意呢個指數，唔知標普500為何物，所以「建制」幫道指篤出一個歷史新高位，就可以製造「花旗國經濟力強」嘅假象。
大家可能會問：「點樣夾硬篤出新高位啊？」其實方法好簡單，道指嘅計法非常古老，令到指數成份股嘅比重，係靠股價計，而唔係市值。會令到出現做飛機嘅波音，雖然市值只有650億美元，比起做電腦CPU嘅英特爾1200億美元市值少45%，不過因為波音股價係81美元一股，而英特爾就得20.5美元，所以波音佔有比重反而高過英特爾四倍。仲有，用現有道指嘅計法，波音升一蚊（1.2%）同英特爾升一蚊（4.8%），對道指嘅影響係一模一樣，所以，波音市值升7.8億美元，就會勁過英特爾市值升57億美元，所以要篤出新高位係有辦法。
目的？問牛仔總統
其實，只要大家睇以下嘅表就會發覺，雖然道指創新高，不過冇一隻成份股本身創歷史以來新高，篤數味濃。仲有，不能不令人懷疑篤數嘅地方，就係只有十隻成份股比起上次千禧年高位升咗，其他都係低過，仲要咁啱得咁蹺，呢十隻有升嘅，全部都係股價最大嘅成份股。
大家可能會問：「點解要夾硬篤出新高位啊？」最簡單直截了當嘅答案就一定係，花旗國牛仔總統啲共和黨戰友，要喺11月第一個禮拜二面對選舉挑戰，做一個欣欣向榮嘅假象，就係最好嘅助選活動，呢個答案，亦可以解釋點解油價係咁跌。牛仔總統搵個有「出過來行」嘅前投資銀行高盛主席做財長，果然「有料到」！