中秋節嚟啦，仲咁熱，開冷氣又有點兒那個，惟有開風扇。嗰日返屋企探阿媽，開大風扇吹自己，點知俾阿媽一手校慢把風扇，阿媽話：「唔好成日開咁大風扇，嘥電呀！」
「唔好成日洗頭，個頭入風會頭痛㗎。」呢類阿媽最鍾意講嘅忠句，真係聽得多，唔想信但又唔敢唔信。
後來同港九電器電業職工會技術總監孫名林傾偈，講開呢單嘢，點知佢話：「風扇開慢定快，用電都係差唔多㗎。」佢話，當較慢風扇時，其實係利用「扼流圈」去控制電流，減低風扇接受到嘅電流，自然會用少啲電，但「扼流圈」本身都有消耗嘅，一樣要電操控，此消彼長，風扇慢速所慳嘅電係有限。
佢仲即刻返屋企用幾把風扇做測試，量度佢哋唔同速度所用嘅電，發現分別真係唔大。
有啲風扇唔同轉速所用嘅電，其實係差唔多，而有分別嘅都係差少少，即係慢速平均只係每小時可以慳1/500度電，即係開動500小時只可以慳一度電：「一度電都唔使一毫子。」
我後來有冇同阿媽講番風扇慢速唔會慳好多電？梗係無啦，邊有做仔女嘅拗得贏阿媽㗎，唔好玩啦。:p