台灣嘅倒扁活動如火如荼。反貪腐倒扁總指揮施明德號召200萬人，喺雙十節嗰日，發起「天下圍攻」行動，實行包圍總統府，迫總統陳水扁下台。香港人身處香港，咪以為可以隔岸觀火，因為香港文化交流基金會主席江素惠特登揀咗呢個咁敏感嘅日子，搞個香江論壇，仲請埋倒扁、挺扁陣營嘅代表，嚟香港討論「建構新型兩岸關係與台灣政局」。
江素惠請到嘅倒扁人馬，包括反貪腐倒扁總部決策小組成員兼台灣大學名譽教授賀德芬；爆出第一家庭幾宗涉嫌弊案、喺台灣有「爆料天王」之稱嘅國民黨立委邱毅。挺扁嗰邊則有民進黨副秘書長蔡煌瑯做代表。
另外，親民黨、新黨同李登輝撐腰嘅台聯，都有立法委員來港出席今次嘅論壇。江素惠仲請埋海協會副會長張銘清、上海東亞研究所所長章念馳等猛人加入討論。如果佢哋都可以順利來港，相信屆時肯定會擦出火花。