噚日蝦叔關海山喺世界殯儀館設靈，一向牙齒印多多嘅無綫收費電視娛樂新聞台同有線娛樂新聞台採訪期間又發生衝突，無綫收費電視好大陣仗咁派出幾組採訪隊包咗靈堂入面嘅情況嚟做，其他傳媒都要企喺出面採訪，其中有一位着白色衫嘅無綫女導演仲好囂張咁話唔畀傳媒企喺靈堂門口，又要求殯儀館職員趕記者出殯儀館，不過人哋冇睬佢。
無綫高層到場
呢位女導演知道邊啲係有線嘅採訪隊，就特登企喺靈堂門口正中位置，等有線影唔到入面嘅情況；對方好有禮貌咁叫佢借借，佢就好寸咁話：「企喺度唔得咩？」之後又攞住張紙喺有線鏡頭前面揚。好彩事後蝦嫂出靈堂睇紙紮品，所以現場傳媒都做到訪問。
之後無綫外事部助理總監曾醒明到場，有線即時向佢投訴，曾醒明話做嘢應以和為貴，佢承認嗰個女同事係衝動咗，有線就話會去信向無綫總經理陳志雲投訴，有線節目發展及製作總監鄺偉茗就話：「上次（8月）喺橫店採訪張栢芝，佢哋已經有員工刻意推門撞我哋同事個頭，今次又係咁，管理層應該正視呢個問題。既然自己已經做咗獨家採訪，點解仲要用啲咁唔恰當嘅行為干預人哋採訪！」