港大1981屆畢業校友為紀念聯合國宣布當年為國際傷殘人士年，特別成立咗「港大81傷健共融」計劃及基金，又舉行高爾夫球日、步行籌款等活動，希望可以幫到更多傷殘人士。佢哋噚日仲特別請咗兩位世界知名嘅失明高爾夫球手嚟籌款，並且即場示範失明人士打高球嘅技巧。
呢兩名失明球手係嚟自英國嘅三屆盲人高爾夫球世界冠軍DavidMorris，同埋來自澳洲嘅國際盲人高爾夫球協會會長DavidBlyth。據DavidMorris講，佢練習時間較常人多出四倍。至於盲人點打波？佢就話主要靠太太同指導員講畀佢聽球洞嘅距離同方向，然後再憑感覺打。
八方真係好佩服佢哋。人哋話打波考眼界，佢哋雙眼睇唔到，都仍然球技驚人；視力尚算健全嘅八方卻自問冇乜ballsense，真係汗顏。