潮流興拆細，意馬國際（臨時編號2975）為改善股份流通量，上星期五正式將股份1拆5，股價單日急升20%，昨日再升4.7%。
呢間公司算得上今年「奇股」之一，由前身做聖誕樹嘅寶途轉型做動畫製作，並獲對沖基金Winnington入股，加上貨源疏落，今年股價長升長有，以昨日收市價計，今年以來已經升咗7倍幾。不過呢間公司現市值已炒高至30億元，在未有盈利提供之下，要諗諗係咪值得高位接貨。
眾彩變相拆細有後着
另一隻變相拆細嘅係眾彩股份（8156），日前宣布每2股送1紅股，並每5股送1紅利認股證，行使價1.33元。眾彩昨日收市只不過1.28元，個零銀錢股票都要變相拆細？消息話眾彩搞咁多嘢係為下一輪大動作鋪路，據稱目標涉及東南亞博彩業務。
昨日一共有９間公司停牌，當中包括聯合系內４間公司，系內公司今年大搞重組，傳聞今次主角係卓健亞洲（593）。咁多公司停牌，電視財經新聞即刻做咗條新聞話有好多公司擬配股集資，但其實涉及集資活動只得中民燃氣（681），公司將發行新股進行收購。
據稱呢次係一單非常重大收購，中民會發新股買入一項位於沿海富庶省分嘅燃氣資產，聽講復牌會有好戲睇咁話。
歐陽風