孫柏文相信，好多人聽過一位股票高人講過：「股災就係最好入市嘅時機。」當然，如果喺成個股票市場裏面，每隻股票都同時大跌，真係可以瞌埋眼，見股就買。不過，如果只係某一類型嘅股票大跌，咁大家就要做足功課，先至好嘗試買平貨。
咁𠵱家就有一類型股票，呢兩日出現災難性跌幅，呢啲公司就係喺倫敦上市、前宗主國經營、客戶主要喺花旗國，從事網上博彩業務嘅公司。呢啲公司嘅股票大跌，原因係花旗國國會早幾日通過法例，全面禁止「任何從境內到境外，涉及網上博彩嘅資金交易同轉動」。
網上麻雀館：傷
跌得最「傷」嘅公司有一間股價大跌前，市值有超過550億港元，開「網上麻雀館」嘅PartyGaming（PartyGaming搵錢模式，同我哋特區嘅麻雀館相似，抽贏家佣、搞比賽收取參賽費等等。不過佢就唔係畀人打麻雀，而係玩TexasHold'emPoker）。PartyGaming股價今年最高見過150便士，上個禮拜五法例通過之前，都仲有100便士一股，不過噚晚，隻股票淨番40便士。
對於好多投資者來講，因為呢啲倫敦上市網上博彩公司畀人嘅印象，就係「前宗主國經營，服務花旗國客戶」，所以花旗國國會一通過呢條法例，所有呢類型嘅股票就即刻大跌。仲有，孫柏文睇番啲分析員報告，原來市場普遍覺得，呢條法例係唔會喺花旗國大選之前表決，所以𠵱家突然成功被表決通過，全個市場都非常愕然，完全喺預期之外。
不過，睇番啲「網賭股」，佢哋隻隻都唔同。首先，有啲公司就係做「體育博彩」，例如賽馬、足球、籃球博彩等等生意，有啲就係直接接受投注，自己做莊家好似香港馬會，又有啲就畀用戶互賭，用戶鍾意做莊受注又得，做閒落注又得，好似交易所一樣。又有啲公司就好似PartyGaming咁，做「網上麻雀館」向用戶收佣金。又有啲公司就畀用戶有「去賭場賭錢」嘅服務，喺網上開「網上賭場」，畀用戶賭廿一點、輪盤、老虎機等等，好似葡京一樣。
呢條法例對唔同業務嘅殺傷力絕對唔一樣，因為好似PartyGaming咁，玩差唔多只有花旗國人賭嘅TexasHold'emPoker，呢條法例就會好傷。不過，如果有間公司嘅主要博彩服務，喺全世界都咁受歡迎（例如搞「網上賭場」），該公司又可以證明，佢嘅花旗國業務佔公司業務比重，喺法例通過之前已經開始下跌，最後仲有每年收入升幅高達30%，市盈率就算以後要撇除花旗國業務，都只有單位數字，咁呢間「網賭股」公司就有值博率。
888Holdings：買
咁究竟有冇咁嘅公司？係有，叫做888Holdings，淨係睇名，都知道佢哋會全心全力拓展中國人市場，上個禮拜五，145便士一股，到噚晚就淨番100便士。888上半年已經賺咗13.8便士一股，如果由第四季開始無花旗國業務（花旗國業務佔公司收入大概一半），今年相信都可以賺取超過25便士一股，市盈率就得4倍。
如果07年非花旗國業務增長可以保持，888喺07年嘅盈利都應該仲有18便士一股，市盈率就係5.5倍，絕對抵買。最後，大家都知道孫柏文對互聯網可以擊破政府任何限制嘅能力，都有無比的信心，花旗國人民只要一日仲想喺網上博彩，呢啲「網賭股」仲有大把市場。如果你可以買倫敦上市嘅股票，不妨考慮買888Holdings。