今年十一黃金周效應失色，作為旅發局主席嘅周梁淑怡自然責無旁貸，噚日佢回應呢單嘢時，同葉局長同一口徑，都係話因為放寬咗自由行，啲內地遊客無咁集中喺黃金周嚟，死口唔認香港吸引力下降。但講講吓佢又燒到煲呔一力推行嘅公務員五天工作制，話因為咁多咗港人外遊，少咗人留港消費。
咁都得？八方諗起，幾個月前嘅五一黃金周訪港旅客較預期少，周梁又係話自由行旅客分散咗喺唔同時間嚟，仲賴個天，話可能同嗰排香港天氣欠佳有關。但事實擺在眼前，人哋澳門迎頭趕上，香港業界又有害群之馬，又呃又𠱁啲遊客購物，做衰香港個名。
旅發局早前已經放風，話今年訪港旅客人數可能未能達標，仲列舉咗好多原因，但都好似唔係好關旅發局事咁。但經常被指係「大花筒」嘅旅發局啱啱又公布員工唔錯嘅加薪幅度，雖然高薪厚祿嘅總幹事臧明華暫不在加薪之列，但係如果肩負推動香港旅遊業重責嘅旅發局仲係用咁嘅心態做嘢，成日賴地硬，唔止「精采旅遊年」變「無精打采旅遊年」，作為特首施政報告中成日奉為香港經濟一大支柱嘅旅遊業，都係咁大。