何文田聖公會蔡功譜中學疑有家賊，開學不足一個月，其中一班學生已被盜去超過20本書及兩部電話，總值超過4,000元。校方表示並無學生就此事報失，但承認開學至今，已有十多宗報失紀錄，包括波鞋及銀包等，校方將會嚴查事件。
要朋友畀錢先還書
聖公會蔡功譜中學學生poorhuman說：「我哋班有啲壞分子，成日偷人哋啲書，仲要唔貴唔偷嗰隻。開學不足一個月，我哋班一共唔見咗超過20本書同兩部電話！一本書200幾蚊，佢哋（偷書同學）拎去旺角賣，賣到幾十蚊。仲有呀，佢哋超黐線㗎，friend嘅書都唔放過，cheap到叫自己嘅friend畀錢先還書。」
該校副校長郭先生表示，未有學生向校方報告此事：「有時同學一件兩件財物唔見咗都會有，但係咁大型就未聽過。」他承認，校內報失紀錄頗多，開學至今已有十多宗，包括鑰匙、波鞋及銀包等，「我哋往年都試過有同學偷嘢，學校亦有報警。」
郭副校長誓言不會讓失竊案不了了之：「咁嚴重嘅事一定會處理，校方會透過班主任向同學查問。」他指出，為免書本被盜，老師也有要求學生在書本上寫上姓名，萬一失竊也可以追查。