上個禮拜五，人稱細劉嘅劉鑾鴻，因為1999年炒賣滙漢嘅股份而被判內幕交易罪成。雖然罰得有幾重要下個月至知，但做唔到董事可以話係必然嘅事。𠵱家細劉喺香港上市公司做董事嘅有三間，全部都係執行董事，其中華人置業（127）做主席；科鑄技術（2302）做主席；利福國際（1212）做董事總經理。三家公司以華置最大，市值超過二百億；利福有百三億；科鑄就好細，得一億。
利福股價升4.6%
細劉冇得做董事，歐資行瑞銀證券驚會有公司管治問題，因為細劉積極參與利福管理，瑞銀唔擔心利福日常運作，因為有一班專業嘅管理層睇住，反而擔心利福喺中國嘅發展可能因而放慢步伐，就係咁，瑞銀調低咗利福嘅投資評級，由叫人買降到中立，即係按兵不動。
噚日上午市，利福嘅股價大部份時間都比上個禮拜嘅15.4元，回落1仙，最後上午都收番15.4元冇跌到，但午市一開，就乖乖不得了，股價由15.4一口氣升到16.5元，最後回一回氣收16.1元，足足升咗4.55%。原來好消息出貨；壞消息入貨的市場智慧係work嘅。
科鑄太細、股價冇郁過，華置則全日低迷，跌咗8仙，收10.22元。其實華置早前用咗1.95億，入股咗隻海油化學（3983），呢隻股由上個禮拜五上市到噚日，兩日升咗超過27%，華置揸住嘅股份，升值5336.8萬元，都算係利好消息。點知，華置反而係唯一下跌嘅劉氏兄弟上市王國嘅成員，唔通細劉冇得做華置董事，影響仲大過利福？
最後補充一句，呢次內幕交易嘅主角──滙漢控股嘅股價表現呢？同科鑄一樣，冇升跌，收1.45元。