為慶祝仙鳳鳴劇團成立50周年，雛鳳鳴劇團將於下個月演出34場《帝女花》，由「仙姐」白雪仙嘅徒弟龍劍笙（阿刨）同梅雪詩（阿嗲）擔綱主演，仙姐親自督師，出任藝術總監。
噚日師徒三人喺金鐘舉行記者會，吸引大批戲迷到場，一睹仙姐呢位粵劇界殿堂級人馬嘅風采。被部份傳媒稱為「石Q」、早排俾阿姐汪明荃批評無資格代表粵劇界嘅立法會議員劉千石都有出席，繼續為仙姐護駕，陪伴左右。對於政府被指對粵劇支援不足，向來低調優雅嘅仙姐輕描淡寫咁話：「講咗好多次，都係冇用。」
舊年同樣由白雪仙親任藝術總監、阿嗲同阿刨主演嘅《西樓錯夢》賣個滿堂紅，門票供不應求，兩度公演合共32場，場場爆滿，令無數雛鳳迷如癡如醉。八方曾經因為撲唔到飛俾阿媽鬧咗成個星期，預計今次雛鳳重演《帝女花》，勢必更加哄動。
阿刨割完膽石驚唔夠氣
仙姐話，今次《帝女花》嘅製作費較之前嘅《西樓錯夢》仲要高，差不多要過千萬，因為服裝同配樂都係全新。問到仙姐會唔會客串一角，仙姐話：「都幾十歲人，梗係做老闆好過做戲。」咁有冇打算自己辦一間學院，教𠵱家嘅年輕人學戲？仙姐續話：「哈哈，我都年紀大喇，開部戲都已經好吃力。」
阿嗲就話，第一次做《帝女花》時已經係1973年嘅事，好在今次只需要應付做戲嘅壓力，細節等其他事都由仙姐負責。剛於兩個月前做完割膽石手術嘅阿刨，佢噚日話已經康復得七七八八，但仍然要小心控制飲食，唔可以食煎炸食物，不過佢話好在《帝女花》係宮闈戲，動作唔多，反而擔心屆時會唔夠氣唱歌。問到佢哋想唔想師父仙姐上台客串，佢哋兩人都話好，不過叫佢哋做說客時，佢兩個即刻話：「徒兒惶恐！」
《帝女花》將於11月2日至9日先喺香港文化中心演出；12月7日至1月4日喺香港演藝學院上演。門票由180至800元不等，10月6日開始賣飛喇！