昨日港股之波幅不大，但好淡大戶嘅惡鬥沒有停止，又係各贏半場，淡友先質低個市，晏晝又畀好友挾返上嚟，即市凶險，唔識走位嘅炒家，又要挾着尾巴走。
恒指升63點，收17606，成交有成400億元，睇嚟好有勢，但係個市其實仍然未變，好淡雙方都等緊一個對自己有利嘅機會大進攻。
隻招行（3968）大幅炒高6.7%，除咗係班發行商幫啲輪鳴鑼開道，搞旺個場，可作為解釋外，真係諗唔到點解，新輪上場最好觀察一段時間先入市，因為新輪嘅「合理水平」好難估，會面對好大風險。
建行C輪2401：唔炒招行輪，可以吼建行輪，建行（939）悶咗好耐，昨日一鳴驚人，大成交衝破咗50日線，雖然只係升咗2.9%，但係對於捧場客嚟講，簡直就係巨龍蘇醒，升破咗3.53元，就向3.70元進發。隻建行C輪2401昨日報收25仙，槓桿率13.9倍（有效8.9倍），引伸波幅19.4%，對沖值0.64，溢價4.8%，仲有163日期，正股升上3.70元，隻C輪應該會上到40仙，呢個價買啲短炒，正股跌穿3.37元止蝕。
建行C輪9748：短炒若博較大槓桿，又要有較高波幅，可以諗吓9748，收23.1仙，槓桿率15倍（有效9.3倍），引伸波幅22.1%，壽命略短，都仲有120日，溢價4.6%，正股升到3.70元，9748應該喺38仙樓上，止蝕參考同2401一樣。
俊樺