大閘蟹大家食得多，發晒姣嘅馬蹄蟹又食過未？呢隻頭盔咁款嘅騎呢怪係蟹？無錯係，佢真名叫海鱟，英文名叫Horseshoecrab，所以又叫馬蹄蟹。愛發姣嘅海鱟乸煮法多多，燉湯得，放湯撈河亦得，人哋話螃蟹過河，都係得嗰七手八腳，馬蹄蟹有成12隻腳喎，肉咁多，梗係要食埋佢啦。
記者：蘇振鵬
攝影：陳陶鈞
模特兒：Wiyona
Makeup：Yukis
海鱟愛發姣
海鱟（Horseshoecrab），形狀似馬蹄又稱馬蹄蟹，是用腮呼吸的原始節肢動物，非真正的螃蟹卻與蜘蛛和蠍子屬近親。牠們出現於4億多年前，與三葉蟲（現在只有化石）同期，故有活化石之稱。海鱟有4隻眼睛，頭胸甲前端有0.5毫米的兩隻小眼睛，兩側多對大複眼，每隻眼睛由若干隻小眼睛組成；殼有兩層，表面盤狀身軀下還有一層殼，用來收藏鱟卵，殼下有被6對節肢包圍的口和幾層腮片。不說不知，「鱟」音「後」，隨後引申成「姣」一字，因為海鱟交配會由雌鱟採取主動，加上體型比雄鱟龐大，一隻雌鱟往往同一時間與四、五隻雄鱟交配，所以用來形容向男人放生電的發姣女人。
海鱟落鑊前要放血
「新光潮州菜館」喺銅鑼灣好響朵，多明星聚腳打冷，店主趙先生係海鮮業聯合總會會員，經常引入到特色海產，罕見海鱟就係其一，因為做法困難，所以香港唔多菜館有得供應，咁難喺邊呢？成個頭盔咁大嘅殼太硬？「唔係，其實佢個殼好軟，絕對無想像中咁硬咁惡搞，最難反而係放血。鱟嘅血呈深藍色，帶輕瀉作用，煮之前唔單止要放亁血，仲要去除腸臟洗到亁亁淨淨。海鱟有毒，入貨嗰陣要留意外殼顏色，外殼偏黃代表毒素勁到入肉入殼，咁就唔食得㗎喇。」
嘩，有毒，為乜要食先？趙先生話：「補囉！用嚟燉湯不知幾咁滋陰補腎，大肚婆坐月最啱，海鱟有利尿功效，對氣管又好，有助醫哮喘，我一定會用乸，食埋啲蛋就最有益。」咁煮法呢？「點煮都得，煮咕嚕肉都仲得，不過客人未必接受到啫，哈哈。我通常加藥材燉湯，或者食佢啲蛋，而且全年都食得㗎。」咁補，難怪每日限售10盅嘅海鱟燉湯都一早俾人訂晒啦。
海鱟燉湯 每盅$80（加$20配河粉）
每日限售10盅，每盅用上四份之一隻海鱟，加無花果、黨參、杞子等藥材燉上8至10小時而成。海鱟本身味淡，反而藥材味濃，配河粉純粹飽肚啲，滋陰補腎啱秋天進補。
海鱟卵炒蛋 $80
每日限售10碟，海鱟卵有層衣，咬落去會卜一聲，甚有咬口，味道甘香唔腥，同蛋味道出奇地夾。
蒜茸粉絲蒸海鱟 $80
海鱟肉食落真係勁似雞肉或豬肉，所以煮法多多，今次用蒜茸粉絲蒸，個Look係怪啲，但海鱟肉吸收晒蒜茸味道，我覺得好味過一般嘅蒜茸開邊蝦。
潮州壯陽鹹蟹 每隻$400起
每日限售10隻，澳洲靚蟹用花雕、玫瑰酒、鹿尾羓、高麗參、杜仲餵兩日，食完暖笠笠好補身，蟹唔多膏唔揀，酒味好濃郁。
乒乓球蠔仔粥 $28
粥底用雞湯炮製，木魚炸得香脆，粒粒都好似乒乓波咁大的巨型台灣蠔仔無泥味，一咬有蠔汁湧出，好味到黃秋生親筆提字話係「天下第一粥」。
解說
螃蟹過河，歇後語是——七手八腳。螃蟹有兩隻箝四對手腳，過河時一齊撥動，分不清哪隻手打哪隻腳。這歇後語就是藉螃蟹過河時的手腳行動不一，比喻人做事手忙腳亂。下次有人說你做事似螃蟹過河，別誤會是讚你快手快腳，相反是揶揄你做事雜亂無章。
食客有Say：知唔知乜嘢叫海鱟？
搵食攻略
新光潮州菜館（25720830）
地址：銅鑼灣駱克道405-419號D舖
交通：銅鑼灣地鐵站A出口
營業時間：5:00pm-5:00am 座位：70個
最好賣：海鱟燉湯、潮州壯陽鹹蟹（請先預訂）